প্ৰাকৃতিক দুৰ্যোগত সৰ্বস্বান্ত হোৱা লোকসকলৰ পুনৰ্বাসন আৰু ৰাজ্যৰ যুৱ প্ৰজন্মক স্বাৱলম্বী কৰাৰ লক্ষ্যৰে কেইবাখনো উল্লেখনীয় কল্যাণমুখী পদক্ষেপৰ কথা ঘোষণা কৰিলে মুখ্যমন্ত্ৰী ড° হিমন্ত বিশ্ব শৰ্মাই। শিৱসাগৰ, চৰাইদেউ আৰু যোৰহাট জিলাৰ বানাক্ৰান্ত পৰিয়ালসমূহলৈ প্ৰত্যক্ষ লাভ হস্তান্তৰ ব্যৱস্থাৰ জৰিয়তে প্ৰতিটো পৰিয়ালক ১৫ হাজাৰ টকাকৈ অন্তৱৰ্তীকালীন বান সাহায্য প্ৰদানৰ ব্যৱস্থা গ্ৰহণ কৰিছে অসম চৰকাৰে।
প্ৰথম পৰ্যায়ত এই তিনিখন জিলাৰ মুঠ ১৬,৭৪৬ টা পৰিয়ালক সামৰি লৈ ২৫.১২ কোটি টকা হস্তান্তৰৰ পদক্ষেপ লোৱা হৈছে। সমগ্ৰ ৰাজ্যখনত এতিয়ালৈকে সৰ্বমুঠ ১,১৭,০৯৫ টা পৰিয়ালক সামৰি মুঠ ১৭৫.৬৪ কোটি টকা সাহায্যৰূপে মুকলি কৰি দিয়া বুলি জানিবলৈ দিয়ে মুখ্যমন্ত্ৰীয়ে।
কেৱল বান সাহায্যই নহয়, ৰাজ্যৰ মানৱ সম্পদ বিকাশ আৰু আন্তঃৰাষ্ট্ৰীয় পৰ্যায়ত যুৱক-যুৱতীসকলৰ নিয়োগযোগ্যতা বৃদ্ধিৰ দিশত বিশেষভাৱে গুৰুত্ব আৰোপ কৰে মুখ্যমন্ত্ৰীয়ে। ৰাজ্যৰ যুৱ প্ৰজন্মক বিদেশী ভাষাৰ প্ৰশিক্ষণ দিয়াৰ বাবে কাৰ্যকৰী কৰা হৈছে ‘চিএম-ফ্লাইট’ আঁচনি। এই আঁচনিৰ অধীনত প্ৰতিগৰাকী প্ৰাৰ্থীক প্ৰশিক্ষণৰ বাবে তিনিটা কিস্তিত ১ লাখ টকা আৰু নিযুক্তিৰ পাছত ৫০ হাজাৰ টকাৰ আৰ্থিক সাহায্য আগবঢ়োৱা হ’ব। এই কাৰ্যসূচীৰ বাবে বৰ্তমানলৈকে ২.৮ কোটি টকা আৱণ্টন দিয়াৰ লগতে ২০২৬-২৭ বৰ্ষত নতুনকৈ ৪৫২ গৰাকী শিক্ষাৰ্থীক নামভৰ্তি কৰোৱা হৈছে।
আনহাতে, স্নাতক ডিগ্ৰীধাৰী নৱপ্ৰজন্মক বিত্তীয় সহায় আগবঢ়োৱাৰ বাবে ‘মুখ্যমন্ত্ৰীৰ জীৱন প্ৰেৰণা আঁচনি’ ৰূপায়ণ কৰাৰ সিদ্ধান্ত গ্ৰহণ কৰিছে ৰাজ্য চৰকাৰে। এই আঁচনিৰ বিষয়ে উল্লেখ কৰি চৰকাৰী তথ্যত প্ৰকাশ কৰা অনুসৰি চৰকাৰী তথা ৰাজহুৱা প্ৰতিষ্ঠানৰ পৰা উত্তীৰ্ণ হোৱা যোগ্য নৱ-স্নাতকসকলে প্ৰতিমাহে ২,৫০০ টকাকৈ ৯ মাহৰ বাবে বিত্তীয় সাহায্য লাভ কৰিব। সৰ্বমুঠ ৪৮,১৮৮ গৰাকী প্ৰাৰ্থীক এই আঁচনিৰ বাবে যোগ্য বুলি চিনাক্ত কৰাৰ লগতে ইয়াৰ বাবদ ১১৮.৬ কোটি টকাৰ বাজেট আৱণ্টন দিয়া হৈছে। বানাক্ৰান্তৰ সকাহ, যুৱ প্ৰজন্মৰ দক্ষতা বিকাশ আৰু নিয়োগ সৃষ্টিৰ স্বাৰ্থতেই এই পদক্ষেপসমূহ কাৰ্যকৰী কৰা বুলি চৰকাৰী সূত্ৰই স্পষ্ট কৰে।
