কৰ্ণাটকৰ ভয়াৱহ খৰাং পৰিস্থিতি আৰু কৃষকৰ চৰম দুৰ্দশাক কেন্দ্ৰ কৰি কেন্দ্ৰীয় চৰকাৰৰ তৎকালীন হস্তক্ষেপৰ দাবী জনাইছে কংগ্ৰেছ সভাপতি মল্লিকাৰ্জুন খাৰ্গেয়ে। শুকুৰবাৰে সামাজিক মাধ্যম ‘এক্স’ৰ জৰিয়তে এই কথা সদৰী কৰি তেওঁ প্ৰকাশ কৰে যে ৰাজ্যখনলৈ শীঘ্ৰে আৰ্থিক সাহায্য আৰু সকাহ প্ৰদানৰ অনুৰোধ জনাই তেওঁ প্ৰধানমন্ত্ৰী নৰেন্দ্ৰ মোদীলৈ এখন বিতং পত্ৰ প্ৰেৰণ কৰিছে। সমান্তৰালকৈ একে বিষয় লৈ তেওঁ কেন্দ্ৰীয় গৃহমন্ত্ৰী অমিত শ্বাহলৈকো সুকীয়া পত্ৰ প্ৰেৰণ কৰিছে।
কংগ্ৰেছ সভাপতিগৰাকীয়ে উল্লেখ কৰা অনুসৰি, এই ভয়ংকৰ খৰাঙৰ ফলত ৰাজ্যখনত ব্যাপক হাৰত শস্য নষ্ট হৈছে আৰু ৩১ লাখতকৈও অধিক কৃষক পৰিয়াল চৰম বিপৰ্যয়ৰ সন্মুখীন হৈছে। এনে সংকটকালত ক্ষতিগ্ৰস্ত কৃষকসকলক পুনৰুজ্জীৱিত কৰিবলৈ কৰ্ণাটক চৰকাৰে ৰাষ্ট্ৰীয় দুৰ্যোগ সঁহাৰি পুঁজি আৰু ৰাজ্যিক দুৰ্যোগ সঁহাৰি পুঁজিৰ অধীনত কেন্দ্ৰীয় চৰকাৰৰ পৰা ৩,৭০৫.৩০ কোটি টকাৰ সাহায্য বিচাৰিছে।
প্ৰধানমন্ত্ৰীলৈ লিখা পত্ৰখনত খাৰ্গেয়ে কয়, “কোনো ধৰণৰ ৰাজনৈতিক বিবেচনাৰ বশৱৰ্তী নহৈ, কৰ্ণাটকৰ বাস্তৱ পৰিস্থিতি আৰু প্ৰয়োজনীয়তাক গুৰুত্ব দি অতি সোনকালে এই সাহায্য মুকলি কৰি দিয়া উচিত। ৰাজ্যখনৰ ৩১ লাখৰো অধিক কৃষক পৰিয়ালৰ চকুলো আৰু সংকটৰ প্ৰতি কেন্দ্ৰই সংবেদনশীল দৃষ্টিভংগী গ্ৰহণ কৰা প্ৰয়োজন।”
ৰাজনীতিৰ উৰ্ধত উঠি বিষয়টোক মানৱীয় দৃষ্টিকোণৰ পৰা চাবলৈ আহ্বান জনাই জ্যেষ্ঠ ৰাজনীতিবিদগৰাকীয়ে আৰু কয়, “খৰাঙৰ কবলত পৰা লোকসকলক সকাহ দিয়াটো এক মানৱীয় প্ৰয়োজনীয়তা। ইয়াক কেন্দ্ৰ আৰু ৰাজ্যৰ মাজৰ কোনো ৰাজনৈতিক মতভেদৰ মাজলৈ টানি অনা অনুচিত। মই আশা কৰোঁ যে ভাৰত চৰকাৰে অতি তৎপৰতা আৰু সংবেদনশীলতাৰে পদক্ষেপ লৈ কৰ্ণাটকক সময়মতে উপযুক্ত সাহায্য প্ৰদান কৰিব।” সামাজিক মাধ্যমত পত্ৰখন ৰাজহুৱা কৰি খাৰ্গেয়ে খৰাংপীড়িত ৰাইজৰ বাবে কেন্দ্ৰীয় চৰকাৰৰ পৰা কেইবাটাও গুৰুত্বপূৰ্ণ ব্যৱস্থা গ্ৰহণৰ দাবী তোলে।
